មនុស្សប្រើប្រាស់ពេជ្រចាប់តាំងពីរាប់ពាន់ឆ្នាំមកហើយ។ ពេជ្រនៅតែតំណាងឲ្យអំណាចនិងកេរ្តិ៍ឈ្មោះ។ ជនល្បីៗនៅទូទាំងពិភពលោកសុទ្ធតែពាក់ពេជ្រ។
គ្រាប់ពេជ្រ
ពេជ្រគឺជារ៉ែដែលគេទាញយកចេញពីក្រោមដី។ ពេជ្រត្រូវបានគេច្នៃដុសខាត់ឲ្យចែងចាំង ហើយលក់ចេញក្នុងតម្លៃដ៏ថ្លៃ។ អស់រយៈពេលច្រើនជំនាន់មកហើយ មនុស្សបានចុះ ទៅក្រោមដីដ៏ជ្រៅដើម្បីរុករកត្បូងមានតម្លៃ។ នេះជាកិច្ចការដ៏លំបាកនិងដ៏មានគ្រោះថ្នាក់។ គ្រាប់ពេជ្រ ពេជ្រកកើតឡើងពីកាបូនរាប់លានឆ្នាំមកហើយ ក្រោមសំពាធនិងកំដៅដ៏ខ្លាំងក្លា ស្ថិតក្នុងជម្រៅរាប់រយគីឡូម៉ែត្រក្រោមសំបកផែនដី។ គេពិនិត្យពេជ្រ និងរក្សាទុកដោយបែងចែកទៅតាមពណ៌។ ពណ៌ដែលល្អបំផុត គឺគ្មានពណ៌។ អ្នកជំនាញពង្រីកមើលពេជ្រមិនទាន់ច្នៃដោយប្រើកុំព្យូទ័រ ដើម្បីងាយស្រួលកាត់។ ពេជ្រគឺជារ៉ែធម្មជាតិដែលរឹងជាងគេបំផុត។ មានតែពេជ្រទេដែលអាចកាត់ពេជ្របាន។ គេថ្លឹងទម្ងន់និងដាក់តម្លៃពេជ្រជាការ៉ាត។ មួយការ៉ាតស្មើនឹងពីររយមីលីក្រាម។ ក្រៅពីទម្ងន់ការ៉ាតនិងពណ៌ តម្លៃរបស់ពេជ្រគឺផ្អែកលើភាពថ្លានិងមុខកាត់គឺរូបរាងរបស់ពេជ្រដែលច្នៃរួច។ ជំនួញពេជ្រអន្តរជាតិមានទំហំ ៨០ ពាន់លានដុល្លារ ក្នុងមួយឆ្នាំ។ ជំនួញនេះជួយអភិវឌ្ឍន៍សេដ្ឋកិច្ចប្រទេស ផ្តល់ការងារដល់កម្មករក្នុងបណ្តាប្រទេសក្រីក្របំផុតមួយចំនួន។ ប៉ុន្តែជំនួញពេជ្រ ក៏ត្រូវបានគេប្រើផងដែរសម្រាប់ជួយដល់សង្រ្គាម បំភិតបំភ័យជនស៊ីវិល និងរក្សាអំណាចជនផ្តាច់ការ។
ពត៌មាន ការអប់រំ និង គន្លិះផ្សេងៗដើម្បីលោកអ្នក 